လုံခြုံရေးကင်မရာများ သုံးစွဲမှု ယခင်ကထက် နှစ်ဆခန့် မြင့်တက်လာ
Wednesday, November 7, 2012
0
comments
လုံခြုံရေးကင်မရာများ သုံးစွဲမှု ယခင်ကထက် နှစ်ဆခန့် မြင့်တက်လာကြောင်း
ပြည်တွင်း အီလက်ရွန်နစ်ဈေးကွက်မှ စုံစမ်းသိရှိရသည်။ လုံခြုံရေးကင်မရာ
ဈေးနှုန်းများမှာ ယခင်ကထက် ပိုမိုသက်သာလာခြင်း၊ တပ်ဆင် အသုံးပြုရခြင်း
စရိတ် သက်သာလာခြင်းနှင့် ကွန်ပျူတာအစား တီဗီဖြင့်ချိတ်ဆက်
အသုံးပြုလာနိုင်ခြင်းတို့ကြောင့် ဈေးကွက်တွင် အသုံးပြုမှု မြင့်တက်လာခြင်း
ဖြစ်သည်။ “အခုဆို CCTV ကင်မရာတွေ အရမ်း ဈေးကျလာတယ်။ ဈေးကျလာတဲ့
နောက်ပိုင်းမှာ အရောင်းက အရင်ကထက် တက်လာတယ်။ ပြီးခဲ့တဲ့လနဲ့ ဒီလဆို
အရောင်းက နှစ်ဆလောက်ကို တက်လာတယ်။ ဆိုင်ကနေဝယ်တာတော့ ဆားဗစ်သမားတွေများတယ်။
သူတို့က တစ်ခါမှာရင်ကို အလုံး ၃၀၊ ၅၀ လောက်ကို မှာကြတယ်။ ဆားဗစ်သမားတွေက
နယ်ကများတယ်။ ရန်ကုန်က သုံးတဲ့သူတွေကတော့ ကိုယ်တိုင် လာဝယ်ကြတာများတယ်။
သူတို့ကိုယ်တိုင် စမ်းသပ်စစ်ဆေးပြီး ဝယ်ကြတာ။ သုံးတာကျတော့ ရန်ကုန်ရော
နယ်ရောမှာပါ ပိုပြီး သုံးလာကြတယ်” ဟု Every Time အမှတ်တံဆိပ် CCTV ကင်မရာ
မြန်မာပြည်တစ်ဦးတည်း ကိုယ်စားလှယ်ဖြစ်သော AGK Computer Shop မှ Office
Manager မသန္တာက ပြောသည်။ ပြည်တွင်းဈေးကွက် အတွင်း၌ တရုတ်ဘက်မှ တင်သွင်းရောင်းချသော CCTV များနှင့်
ဆွီဒင်၊ မလေး၊ စင်ကာပူ၊ အိန္ဒိယစသည့် နိုင်ငံတကာတွင် နာမည်ကြီး
ကျော်ကြားလျက်ရှိသော Branded အမှတ်တံဆိပ် CCTV များလည်းရှိပြီး
ဈေးနှုန်းအားဖြင့် များစွာကွာခြားမှုရှိကြောင်း သိရသည်။ ယခင်က CCTV
ကင်မရာများကို Coaxi ကြိုးများဖြင့် သုံးရပြီး ကင်မရာနှင့်
ကြိုးဈေးနှုန်းမှာ ကြီးမြင့်ခဲ့ရာ ယခုနောက်ပိုင်းတွင် ကင်မရာဈေးနှုန်းမှာ
သက်သာလာသလို ဖုန်းလိုင်းဆွဲသည့် 10 pairs ကြိုးဖြင့်
အသုံးပြုလာနိုင်သည့်အတွက် ကြိုးဈေးနှုန်းမှာလည်း အရင်ကထက်များစွာ
သက်သာလာသောကြောင့် အသုံးပြုမှု ပိုမိုများပြားလာခြင်း ဖြစ်ကြောင်း သိရသည်။
ယခင်ကထက် လုံခြုံရေးကင်မရာများကို ရန်ကုန်ရှိ စတိုးဆိုင်များ၊
ရွှေဆိုင်များ၊ ကုန်တိုက်များ၊ ကုန်စုံဆိုင်များ၊ ကားပါကင်များ၊
သင်တန်းကျောင်း စသည်တို့တွင် ပိုမိုအသုံးပြုလာပြီး နယ်မြို့များတွင်လည်း
လုံခြုံရေး ကင်မရာများကို ယခင်ကထက် ပိုမိုသုံးစွဲလာကြောင်း သိရသည်။ တရုတ်ဘက်မှ တင်သွင်းရောင်းချသည့် ဈေးနှုန်း သက်သာသော
လုံခြုံရေးကင်မရာများကို ရန်ကုန်တွင် ပိုသုံးလာကြောင်းကို ဆားဗစ်ပညာရှင်
တစ်ဦးက “ရန်ကုန်မှာ အရင်ကထက် သုံးလာတယ်။ ရွှေဆိုင်တွေ၊ စတိုးဆိုင်တွေမှာ
သုံးလာကြတယ်။ တချို့ သင်တန်းကျောင်းတွေလည်း သုံးတာမျိုးရှိတယ်။
အများအားဖြင့် ဈေးသက်သာပြီး ပေါပေါသုံးနိုင်တာမျိုးကို ပိုသုံးကြတာ။
ကင်မရာကလည်း ဈေးသက်သာတယ်။ သုံးရတဲ့ ကြိုးကလည်း ဈေးသက်သာတယ်။ အရင်ဆို
ကွန်ပျူတာနဲ့ချိတ်ပြီး သုံးရတာ။ အခုနောက်ပိုင်းမှာ တီဗီနဲ့ချိတ်ပြီး
သုံးလိုက်ရင်ကို ရလာတယ်။ ကြိုးကိုလည်း ဖုန်းကြိုး၊ နက်ဝက်ခ်ကြိုးနဲ့
တီဗီကြိုးတွေသုံးပြီးကို လုံခြုံရေးကင်မရာတွေ ဆင်လို့ရလာတဲ့အတွက်
အရောင်းဆိုင်တွေ တော်တော်များများမှာ သုံးလာကြတယ်” ဟု ၎င်း၏အမြင်ကို ပြောသည်။ “လုံခြုံရေးကင်မရာ တပ်ထားရတာက သင်တန်းသားတွေ သင်ခန်းစာတွေကို တကယ်
စိတ်ပါဝင်စားစွာ သင်ယူမှုရှိမရှိ၊ ဆရာတွေကလည်း သင်ကြားမှုအပေါ်မှာ ဘယ်လောက်ထိ
အာရုံစိုက်တယ် ဆိုတာမျိုးတွေ သိရအောင် တပ်ထားတာပါ။ နောက်ပြီး
သင်တန်းတက်တဲ့သူရဲ့ အရေအတွက်ကိုလည်း ဒီကနေ ကြည့်လို့ရတယ်။ ဝန်ထမ်းတွေရဲ့
အခြေအနေကိုရောပေါ့။ ကျောင်းသားတွေရဲ့ အခြေအနေကိုတော့ ကိုယ်က
အခန်းထဲကနေကြည့်ပြီး လိုအပ်တဲ့ ညွှန်ကြားမှုတွေ လုပ်နိုင်အောင်ပါ” ဟု
လုံခြုံရေးကင်မရာ တပ်ဆင်အသုံးပြုထားသော ကွန်ပျူတာသင်ကျောင်းမှ
တာဝန်ရှိသူတစ်ဦးက ရှင်းပြသည်။ ဈေးကွက် အတွင်း၌ လုံခြုံရေးကင်မရာများကို Package အနေဖြင့်
ဆားဗစ်ပေးရောင်းချသလို တစ်လုံးခြင်း အနေဖြင့်လည်း ရောင်းချလျက်ရှိပြီး
တစ်လုံးခြင်းရဲ့ ဈေးနှုန်းမှာ အနိမ့်ဆုံး ကျပ်နှစ်သောင်းကျော် ဝန်းကျင်မှ
အမြင့်ဆုံး ကျပ်တစ်သိန်းကျော်အထိ ရှိကြောင်း သိရသည်။ လုံခြုံရေး
ကင်မရာများကို ယခင်ကထက် အလွယ်တကူ တပ်ဆင် အသုံးပြုနိုင်ခြင်း၊
ဈေးနှုန်းသက်သာခြင်းနှင့် တွင်ကျယ်စွာ အသုံးပြုလာခြင်းတို့ကြောင့် ယခင်ကထက်
သုံးစွဲမှု မြင့်တက်လာခြင်း ဖြစ်ကြောင်း ဈေးကွက်မှ စုံစမ်းသိရှိရသည်။
(သူရ)
(သူရ)
0 comments:
Post a Comment